काठमाडौं ।
गएराति सम्पन्न पाँच खेलको सिरिजको चौथो खेलमा भारतले दक्षिण अफ्रिकालाई ८२ रनले हरायो । योसँगै यो सिरिज २–२ को बराबरीमा पुगेको छ । टिम इण्डिया दोस्रो खेलमा एक पटकपछि परेको थियो, तर सबै खेलाडीले उत्कृष्ट प्रदर्शन गर्दै टोलीलाई फिर्ता गराए। यो जितपछि कप्तान ऋषभ पन्तले प्रतिक्रिया दिएका छन् ।
‘हामीले रणनीतिको कार्यान्वयनको बारेमा कुरा गर्यौं र नतिजा आयो । अब सिरिजको टुंगो १९ जुनमा बैंगलोरमा हुने पाँचौं टी–२० खेलबाट हुनेछ । हामीले कार्यान्वयनको कुरा गर्यौं र नतिजा तपाईसामु छ,’ पन्तले भने । उनले आफू लयमा फर्किन पूरा कोसिस गरिरहेको पनि बताए । पन्तले लगातारको जितले हौसला मिलरहेको पनि बताए ।
‘व्यक्तिगतरूपमा मेरो प्रदर्शन सन्तोषजनक हुन सकेको छैन । लयमा फर्किन म पूरा कोसिस गर्छु । कप्तानीमा पनि थप अनुभव हासिल गर्ने मौका छ । सिरिजको निर्णायक म्याचमा हामी थप उत्कृष्ट प्रदर्शन गर्ने पूरा कोसिस गर्नेछौं,’ पन्तले भने ।
शुक्रबार राति भएको खेलमा भारतले दिएको १७० रनको लक्ष्य पछ्याएको दक्षिण अफ्रिकाले १६.५ ओभरमा ९ विकेट गुमाएर ८७ रन मात्र बनाउन सक्यो । टी–२० दक्षिण अफ्रिकाको यो हालसम्मकै कम स्कोर हो । उसका लागि रस्सीभानडर दुसेनले २०, क्विन्टन डिककले १४ र मार्को जेन्सनले १२ रन बनाए । बाँकी ब्याटरले भने दोहोरो अंकमा समेत रन जोड्न सकेनन् । भारतका लागि आवेश खानले ४ ओभरमा १८ रन दिएर चार विकेट लिए ।
त्यस्तै, युजवेन्द्र चहल, अक्षर पटेल र हर्षल पटेलले एक/एक विकेट हात पारे । त्यसअघि राजकोटस्थित सौराष्ट्र क्रिकेट संघ स्टेडियममा टस हारेर ब्याटिङको मौका पाएको भारतले निर्धारित २० ओभरमा ६ विकेट गुमाएर १६९ रन बनाए । उसका लागि दिनेश कार्तिक र हार्दिक पाण्ड्याले उत्कृष्ट पारी खेले ।
कार्तिकले २७ बलमा ९ चौका र दुई छक्कासहित ५५ रनको पारी खेले । टी–२० अन्तर्राष्ट्रियमा उनको यो उच्च स्कोर हो । यसअघि यो प्रारूपमा उनको उच्च स्कोर ४८ रन थियो । त्यस्तै, ३१ बलको सामना गरेका हार्दिकले तीन चौका र तीन छक्का हिर्काउँदै ४६ रन बनाए ।
उनको पनि यो टी–२० अन्तर्राष्ट्रिय करियरकै उच्च स्कोर हो । यसअघि टी–२० मा उनको उत्कृष्ट ब्याटिङ ४२ रन बनाउनु थियो । तेस्रो खेलमा इशान किशन २७, कप्तान ऋषभ पन्त १७, ऋतुराज गायकवाड पाँच र श्रेयस अय्यर चार रनमा आउट भए । त्यस्तै, अक्षर पटेल चार र हर्षल पटेल एक रनमा अविजित रहे ।
दक्षिण अफ्रिकाका लागि लुंगि एन्गिडीले दुई, ड्वेन प्रिटोरियस, केशव महाराज, एनरिक नोर्टजे र मार्को जेन्सनले एक/एक विकेट हात पारे । पाँच खेलको सिरिजमा पाहुना टोली दक्षिण अफ्रिकाले २–१ को अग्रता बनाएको छ । ऊ पहिलो खेलमा सात र दोस्रो म्याचमा चार विकेटले विजयी भएको थियो । अब भारत–दक्षिण अफ्रिकाबीचको निर्णायक खेल अर्थात पाँचौं खेल आइतबार हुनेछ ।