काठमाडौं ।
नेपाली राष्ट्रिय फुटबल टिमले मैत्रीपूर्ण खेल खेल्ने पक्का भएको छ। राष्ट्रिय फुटबल टिमले अर्को महिनामा मैत्रीपूर्ण खेल खेल्ने अखिल नेपाल फुटबल संघ (एन्फा)ले जनाएको छ।
मैत्रीपूर्ण फुटबल म्याच खेल्ने तीन देशले प्रस्ताव गरेका छन्। नेपाललाई बंगलादेश, लाओस र ब्रुनेइले प्रस्ताव गरेको जनाइएको छ। खेल आउँदो सेप्टेम्बर महिनामा हुने भनिएपनि आधिकारिक मिति भने तय भइसकेको छैन।
ब्रुनाईले आफ्नो नयाँ रंगशालाको उद्घाटनको अवसरमा नेपाल र लाओसलाई आमन्त्रण गर्दै त्रिपक्षीय फुटबल सिरिज आयोजना गर्न प्रस्ताव अघि सारेको हो । फिफा मितिमा हुने अन्तर्राष्ट्रिय मान्यता प्राप्त खेलका लागि नेपाललाई गत साता नै ब्रुनाईले प्रस्ताव गरेको हो ।
प्रस्ताव अनुसार असोज ५ गते लाओस र नेपालको खेल, असोज ८ गते ब्रुनाई र नेपाल तथा असोज ११ गते ब्रुनाई र लाओसको खेल गर्ने तालिका प्रस्ताव गरिएको छ । आयोजक राष्ट्र ब्रुनाईले स्थानीय बसोबास, खानपिन र आवतजावत सम्पूर्ण खर्च बेहोर्ने बताएको छ । अन्तर्राष्ट्रिय हवाई यात्राबारे भने प्रस्तावमा केही उल्लेख छैन ।
अखिल नेपाल फुटबल संघ (एन्फा) मा नयाँ नेतृत्व आएपछि दोस्रो कार्यसमिति बैठक बस्न सकेको छैन । दुई पटक बैठक स्थगित हुँदा प्रतियोगिता र फुटबल क्यालेन्डर जस्ता गम्भिर विषयमा पनि निर्णय हुन सकेको छैन । मैत्रीपूर्ण खेलका लागि एक साताअघि नै प्रस्ताव आएको र एन्फाले हालसम्म यसबारे कुनै अधिकारिक धारणा सार्वजनिक गरेको छैन ।
आर्थिक संकटका कारण अन्य देशमा जान नसकिने हुँदा मैत्रीपूर्ण खेल नेपालमै हुने प्रवल सम्भावना रहेको छ। नेपालले गत जुनमा एएफसी एसियन कप छनोटमा सहभागिता जनाएको थियो।
कुवेतमा भएको छनोटमा नवयुग श्रेष्ठको कप्तानीमा रहेको नेपाल अंकविहीन बनेको थियो। समूह ए मा रहेको नेपाल समूहको पुछारमा रहेको थियो। छनोटको पहिलो खेलमा नेपाल जोर्डनसँग २–० ले पराजित भएको थियो।
दोस्रो खेलमा आयोजक कुवेतसँग ४–१ गोल अन्तरले हारेको नेपाल अन्तिम खेलमा इन्डोनेसियासँग ७–० गोल अन्तरले पराजित भएको थियो। यो प्रतियोगिता सिनियर १० खेलाडीले खेलेका थिएनन्।
एसियन कप छनोट प्रतियोगितापछि नेपालले कुनै पनि अन्तर्राष्ट्रिय म्याच खेलेको छैन। टिमका मुख्य प्रशिक्षक अब्दुल्लाह अलमुताइरी बिरामी बिदामा अहिले कतारमा रहेका छन्। एन्फामा नयाँ नेतृत्व आएयता नेपाली पुरुष र महिला टोलीले कुनै पनि अन्तर्राष्ट्रिय प्रतियोगिता खेलेका छैनन्।
नेपाली महिला टिमले आगामी भदौ तेस्रो साता नेपालमै हुने साफ च्याम्पियनसिप खेल्दैछ। एन्फाको नयाँ नेतृत्वले प्रशिक्षकसँगको विवादमा राष्ट्रिय टिमबाट निकालिएका खेलाडीलाई फिर्ता बोलाउने निर्णय गरिसकेको छ।
टिमको व्यवस्थापनको विषयलाई लिएर अल्मुताइरीले उपकप्तान रोहित चन्दसहित १० खेलाडीलाई राष्ट्रिय टिमबाट बाहिर निकालेका थिए। उनले खेलाडीलाई समर्थन गरेको आरोपमा नियमित कप्तान किरण चेम्जोङलाईसमेत राष्ट्रिय टिमबाट बाहिर राखेका थिए।
सिनियर खेलाडी रोहितसहित सुजल श्रेष्ठ, अनन्त तामाङ, सुमन लामा, विशाल राई, विमल घर्तिमगर, दिनेश राजवंशी, विशाल श्रेष्ठ र अन्जन विष्टलाई टिमबाट निकालिएको थियो। अब यी खेलाडीले मैत्रीपूर्ण खेल्ने सम्भावना प्रवल छ।
