काठमाडौं ।
नेपाली राष्ट्रिय टोलीका कप्तान रुबिना क्षेत्री र सीता राना मगरको आईसीसी महिला टी-ट्वान्टी वरीयतामा सुधार भएको छ । अन्तराष्ट्रिय क्रिकेट परिषद (आईसीसी) ले अपडेट गरेको पछिल्लो वरीयतामा रुबिनाको ब्याटिङ र बलिङ वरीयता सुधार भएको छ ।
ब्याटिङ वरीयतामा रुबिना ८५ औं स्थानमा उक्लिएकी छिन् । यस्तै बलिङतर्फ ८० औं स्थानमा उक्लिएकी छिन् । पूर्व उपकप्तान सीताको ब्याटिङ वरीयता ६४ औं स्थानमा यथावत रहेको छ । बलिङ वरीयतामा भने सीता ७९ औं स्थानमा उक्लिएकी छिन् ।
बलिङतर्फ नै कविता कुँवर ७३ औं स्थानमा यथावत रहेकी छिन् । ब्याटिङमा नेपालकी ज्योति पाण्डे १०० औं स्थानमा रहेकी छिन् । आईसीसी महिला टी-ट्वान्टी राष्ट्रको वरीयतामा नेपाल १८ औं स्थानमा रहेको छ।
एसियाली खेलकुदको नयाँ मिति घोषणा :
चीनको हाङझाउमा आगामी हुने तय १९ औं एसियाली खेलकुद प्रतियोगिता (एसियाड) को नयाँ मिति घोषणा गरिएको छ। ओलम्पिक काउन्सिल अफ एसिया (ओसिए) ले सन् २०२३ को सेप्टेम्बर २३ देखि अक्टोबर ८ सम्म एसियाली खेलकुद हुने जनाएको हो।यसअघि कोभिड- १९ का कारण यो वर्ष हुने तय एसियाली खेलकुद स्थगित गरिएको थियो।
ओसिएका अनुसार चाइनिज ओलम्पिक कमिटी र हाङझाउ एसियन गेम्स आयोजक कमिटीको कार्यकारी बोर्डसँगको छलफलपछि एसियाली खेलकुद नयाँ मिति घोषणा गरेको हो।
एसियन देशका लागि ओलम्पिकपछिको प्रतिष्ठित प्रतियोगिता एसियाली खेलकुदको तयारीमा चीनमा बढिरहेको कोरोना भाइरसले असर गरेको थियो। जसका कारण प्रतियोगिता स्थगित गरिएको भएको थियो।
यो प्रतियोगिताका लागि नेपालले पनि तयारी गरिरहेको छ। राष्ट्रिय खेलकुद परिषद्ले एसियाडमा समावेश ३७ मध्ये २३ खेलमा भाग लिने निर्णय थियो। यी खेलका लागि प्रारम्भिक खेलाडी छनोट समेत गरेको छ।
एथ्लेटिक्स, बक्सिङ, तेक्वान्दो, कराते, साइक्लिङ, महिला फुटबल, गल्फ, कुस्ती, भारत्तोलन, जुडो, ट्रायथलन, उसु, आर्चरी, बास्केटबल, महिला कबड्डी, फेन्सिङ, महिला ह्यान्डबल, टेबल टेनिस, महिला भलिबल, पुरुष क्रिकेट, ब्याडमिन्टन, पौडी र सुटिङमा नेपालले भाग लिने निर्णय गरेको थियो।