काठमाडौं । भारतको गुजरातमा जारी फ्रेन्डसिप कप टी-ट्वान्टी त्रिकोणात्मक क्रिकेट प्रतियोगिताको उपाधीका लागि नेपाली राष्ट्रिय क्रिकेट टोली र गुजरात क्रिकेट एसोसिएसनको टोली खेल्ने भएका छन् ।
समुह चरणको शीर्ष दुईमा रहने टोलीले फाइनलमा स्थान बनाउँने नियम अनुसार नेपाल र गुजरातले फाइनल खेल्ने भएका हुन् ।
बिहीबार भएको समूह चरणको आफ्नो अन्तिम खेलमा गुजरातले बरोडा क्रिकेट एसोसिएसनको टोलीलाई ५७ रनले पराजित गर्दै फाइनलमा स्थान बनाएको हो ।
गुजरातले दिएको १ सय ६४ रनको लक्ष्य पछ्याएको बरोडाले १६ दशमलब ४ ओभरमा १ सय ६ रनमा बनाउँदै अल आउट भयो ।
समुह चरणको अन्तिम खेलमा शुक्रबार नेपाल र बरोडा खेल्ने तापनि गुजरातको ४ खेलबाट ४ अंक भईसकेको छ । बरोडाले नेपालविरुद्धको खेल जिते पनि उसको २ अंक मात्र हुने हुँदा बरोडाले एक खेल्न बाँकी रहे पनि गुजरातले फाइनलमा स्थान बनाएको हो । नेपालले भने बुधबार नै एक खेल अगावै फाइनलमा स्थान पक्का गरिसकेको थियो ।
अब नेपाल र गुजरातको टोलीबीच आइतबार उपाधीका लागि खेल हुनेछ । समूह चरणका दुवै खेलमा नेपालले गुजरातलाई पराजित गरेको थियो ।
