काठमाडौं । १७ औं संस्करणको इन्डियन प्रिमियर लिग(आइपीएल) को १९ औं खेलमा विराट कोहलीको शतकको मद्दतमा रोयल च्यालेन्जर्स बेंगलुरुले राजस्थान रोयल्सलाई १ सय ८४ रनको लक्ष्य दिएको छ ।
राजस्थानको घरेलु मैदान सवाईमानसिंह क्रिकेट स्टेडियममा टस हारेर पहिले ब्याटिङ गरेको पाहुना टोलीले निर्धारित २० ओभरमा ३ विकेट गुमाएर १ सय ८३ रन बनायो ।
बेंगलुरुका लागि विराट कोहलीले ७२ बलमा १२ चौका र ४ छक्काको सहयोगमा अविजित १ सय १३ रनको शतकीय ईनिङ खेले । आइपीएल ईतिहासमा आफ्नो आठौं शतक कोहलीले ६७ बलमा पुरा गरेका थिए । यो सिजनको यो नै पहिलो शतक रहेको थियो ।
कप्तान फाफ डु प्लेसिसले ३३ बलमा २ चौका र २ छक्काको सहयोगमा ४४ रन बनाए । पहिलो विकृटका लागि कोहली र फाफले १३ दशमलब ६ ओभरमा १ सय २५ रनको साझेदारी गरे । अन्य खेलाडीले दोहोरो अंकमा रन बनाउँन सकेनन् ।
ओपनरले दिलाएको सुरुआत अनुसार पछिल्ला क्रमका ब्याटर नचल्दा टोली २ सयको योगफल बनाउने अवसरबाट पछि पर्यो ।
राजस्थानका लागि युजभेन्द्र चहलले २ तथा नान्द्रे बर्गरले १ विकेट लिए ।
