Khabar Board

टी–२० विश्वकपलाई ध्यानमा राखी इङ्ल्यान्डका यी प्रभावशाली बलर खेलमा फर्किए !

काठमाडौँ । इङ्ल्यान्डका प्रभावशाली बलर जोफ्रा आर्चर एक वर्षभन्दा लामो समयपछि खेलमा फर्कने भएका छन् । आर्चरले बुधबार सुरु हुने पाकिस्तानविरुद्धको पहिलो टी–२० शृंखला खेल्ने भएका छन् ।

इङ्ल्यान्डका कप्तान जस बट्लरले पनि आर्चर खेलमा फर्कने समाचारको पुष्टि गरेका छन् । २९ वर्षीय आर्चर तीन सय ८२ दिनपछि अन्तर्राष्ट्रिय प्रतियोगितामा फर्कन लागेका हुन् । इङ्ल्यान्ड र पाकिस्तानबिचको पहिलो टी–२० अन्तर्राष्ट्रिय प्रतियोगिता बुधबार राति खेलिँदै छ ।

आर्चर आगामी आईसीसी टी–२० विश्वकपलाई ध्यानमा राखी अन्तर्राष्ट्रिय प्रतियोगितामा फर्किएका हुन् । ‘आर्चर लामो समयपछि अन्तर्राष्ट्रिय क्रिकेटमा फर्कँदै छन् । विश्वकपअघि उनको आगमनले हामी उत्साही छौँ,’ कप्तान बट्लरले भनेका छन् ।

आर्चर स्वास्थ्य समस्याका कारण लामो समयदेखि मैदान बाहिर थिए । उनी पिठ्यूँ र कुइनोको चोटबाट पिडीत थिए । पाकिस्तानविरुद्धको शृंखलाका लागि टोलीमा फर्कनुअघि उनले बार्बाडसमा आफ्नो क्लब विल्डीबाट पनि खेलेका थिए ।

इङ्ल्यान्डले जुन १ देखि २९ तारिखसम्म अमेरिका र वेस्ट इन्डिजमा संयुक्त रुपमा आयोजना हुने टी–२० विश्वकपका लागि घोषित १५ सदस्यीय टोलीमा पनि आर्चरलाई समावेश गरेको छ ।

तीव्रगतिका बलर आर्चरले हालसम्म इङ्ल्यान्डका लागि १५ खेल खेल्दै १८ विकेट लिइसकेका छन् । उनले देशका लागि टेस्ट र एकदिवसीय अन्तर्राष्ट्रिय प्रतियोगिता पनि खेलिसकेका छन् ।

टी–२० विश्वकपअघि इङ्ल्यान्डले पाकिस्तानसँग चार खेलको शृंखला खेल्दैछ । शृंखलाको दोस्रो खेल शनिबार, तेस्रो खेल आगामी मंगलबार र चौथो खेल आगामी बिहीबार खेलिने छ ।

आगामी टी–२० विश्वकपमा इङ्ल्यान्ड समूह ‘बी’ मा परेको छ । उक्त समूहमा अस्ट्रेलिया, नामिबिया, स्कटल्यान्ड र ओमान रहेका छन् । विश्वकपमा इङ्ल्यान्डले आफ्नो पहिलो खेल जुन ४ तारिखमा स्कटल्यान्डसँग खेल्नेछ ।

 

Hetuda computer
याे पनि हेर्नुस्
प्रतिक्रिया दिनुहाेस्

Your email address will not be published.