हेटौँडा । हेटौँडा–५, सानो पोखरामा जन्मिएका सामाजिक अभियन्ता विशालराज महतलाई ‘दोस्रो आरोही व्यक्तित्व सम्मान–२०८३’बाट सम्मान गरिएको छ। आरोही बिट्सले प्रदान गरेको सम्मानपत्रमा महतलाई ‘निडर अभियन्ता तथा वरिष्ठ समाजसेवी’का रूपमा उल्लेख गर्दै अन्याय र भ्रष्टाचारविरुद्धको अभियान, नागरिकका सवालमा खबरदारी तथा असहाय र पीडितका पक्षमा पुर्याएको योगदानको प्रशंसा गरिएको छ।
लामो समयदेखि आम नागरिकका समस्या बोकेर सम्बन्धित निकायको ढोका ढकढक्याउँदै आएका महत सामाजिक अभियन्ताका रूपमा हेटौँडामा परिचित छन्। अन्याय देख्दा चुप नबस्ने, पीडितको आवाज सम्बन्धित निकायसम्म पुर्याउने र सार्वजनिक सरोकारका विषयमा खरो रूपमा प्रश्न उठाउने उनको शैलीले स्थानीयस्तरमा छुट्टै पहिचान बनाएको छ।
महतको सामाजिक अभियान विरोध र खबरदारीमा मात्र सीमित छैन। शिक्षा, स्वास्थ्य, मानवीय सहयोग तथा सामाजिक सेवाका क्षेत्रमा समेत उनी निरन्तर सक्रिय रहँदै आएका छन्। ‘सेवा, सहयोग र आवाज’ अभियानमार्फत आर्थिक अभावका कारण उपचारबाट वञ्चित व्यक्तिका लागि उपचारको पहल गर्नुका साथै विपन्न तथा असहाय परिवारलाई सहयोग जुटाउने कार्यमा समेत उनको सक्रियता रहेको छ।
हेटौँडा–१८ स्थित वैदिक संस्कृत गुरुकुलका विद्यार्थीलाई शैक्षिक तथा खाद्यान्न सहयोग गर्ने अभियानमा पनि महत सहभागी हुँदै आएका छन्। विद्यार्थीका लागि बेञ्च, कुर्सी तथा खाद्यान्न उपलब्ध गराउने कार्यमा उनको भूमिका रहेको बताइएको छ।
नागरिकको स्वास्थ्य र अधिकारका विषयमा आवाज उठाउने क्रममा महतले व्यक्तिगत कठिनाइसमेत सामना गरेका छन्। हेटौँडा अस्पतालसँग सम्बन्धित सार्वजनिक सरोकारको विषयमा आम नागरिकको पक्षमा आवाज उठाउने क्रममा उनले हिरासतसमेत खेपेका थिए। आम नागरिक तथा राजनीतिक दलहरूको पहलपछि उनी हिरासतमुक्त भएका थिए। उक्त घटनाले नागरिकका सवालमा आवाज उठाउँदा व्यक्तिगत जोखिमसमेत मोल्न तयार रहने उनको स्वभावलाई उजागर गरेको थियो।
पछिल्लो समय औद्योगिक प्रदूषण, वातावरणीय समस्या तथा नागरिक अधिकारका विषयमा पनि महतको सक्रियता बढेको छ। विशेषगरी शिवम् सिमेन्टबाट प्रभावित हेटौँडा–१६, १७ र १८ लगायतका क्षेत्रका नागरिकका सवालमा उनले निरन्तर आवाज उठाउँदै आएका छन्। उद्योग, स्थानीय सरकार तथा सम्बन्धित निकायसँग नागरिकका समस्या समाधानका लागि प्रश्न गर्ने र प्रभावित समुदायको पक्षमा उभिने उनको अभियानले स्थानीयस्तरमा चर्चा पाएको छ।
महतको सामाजिक अभियानको मुख्य विशेषता नै भुइँतहका नागरिकका समस्या र आवाजलाई सम्बन्धित निकायसम्म पुर्याउनु रहेको छ। पहुँच, प्रभाव वा दबाबभन्दा नागरिकको समस्या ठूलो हुनुपर्ने मान्यताका साथ उनी सामाजिक अभियानमा सक्रिय रहँदै आएका छन्।
भ्रष्टाचारविरुद्ध खबरदारी, सार्वजनिक सेवा प्रवाहमा सुधार, स्वास्थ्य सेवामा नागरिकको पहुँच, वातावरण संरक्षण, शिक्षा, विपन्न वर्गको सहयोग तथा स्थानीय तहमा हुने अनियमिततामाथि प्रश्न उठाउने विषय महतले निरन्तर उठाउँदै आएका छन्।
‘आरोही व्यक्तित्व सम्मान–२०८३’ महतका लागि एउटा सम्मानपत्रमा मात्र सीमित नभई वर्षौँदेखि भुइँमान्छेका समस्या बोकेर हिँडेको सामाजिक यात्राको सार्वजनिक सम्मानका रूपमा हेरिएको छ। व्यक्तिगत लाभभन्दा नागरिकका सवाललाई प्राथमिकता दिँदै आएका महतले प्राप्त गरेको सम्मानले उनको सामाजिक अभियानलाई थप ऊर्जा दिने अपेक्षा गरिएको छ।
सम्मानपछि महतले ‘धन्यवाद, यो माया र सम्मानका लागि’ भन्दै सम्मानप्रति आभार व्यक्त गरेका थिए। उनको उक्त अभिव्यक्तिले सम्मानप्रतिको सरलता र नागरिकसँगको आत्मीय सम्बन्धलाई समेत झल्काएको छ।
हेटौँडाको स्थानीय परिवेशबाट सुरु भएको महतको सामाजिक अभियान पछिल्लो समय स्थानीय सीमाभन्दा बाहिरसमेत परिचित हुँदै गएको छ। भुइँतहका नागरिकका पीडा, गुनासा र प्रश्नलाई सार्वजनिक बहसको विषय बनाउँदै आएका महतका लागि यो सम्मान उपलब्धिसँगै जनताको आवाज बन्ने यात्रामा थप जिम्मेवारीको सुरुवातका रूपमा समेत लिइएको छ।
