Khabar Board

२० हजार प्रहरीको बढुवा हुँदै, वरिष्ठ सई, वरिष्ठ हवल्दार र सहायक हवल्दार थपिने

काठमाडौं । प्रहरीमा एकैपटक २० हजार प्रहरीको बढुवा हुने भएको छ । बुधबार बसेको मन्त्रिपरिषद्को बैठकले नेपाल प्रहरीको नियमावली संशोधन प्रस्ताव पारित गरेसँगै प्रहरीको एकैपटक यति ठूलो संख्यामा बढुवा हुन लागेको हो ।मन्त्रिपरिषद्ले पारित गरेको नियमावलीमा प्रहरीमा वरिष्ठ सई, वरिष्ठ हवल्दार र सहायक हवल्दार पद थप्ने प्रावधान राखिएको छ ।

सरकारको यो निर्णय राजपत्रमा प्रकाशित भएपछि लागु हुनेछ । प्रहरी प्रवक्ता एसएसपी वसन्तबहादुर कुवँरले पछिल्लो निर्णयबाट तल्लो तहका प्रहरीमा सकारात्मक सन्देश गएको बताए ।

१०/१२ वर्षसम्म पनि एकै तहमा रहनुपर्ने, बढुवा नहुँदा जागिर छाड्ने, निराशा बढ्दै गएको भन्दै प्रहरी प्रधान कार्यालयले तह बढुवाको प्रक्रिया अगाडि बढाएको थियो । प्रहरीमा तल्लो दर्जाको मनोबल वृद्धिका लागि के गर्न सकिन्छ भन्नेबारे समिति नै गठन गरे अध्यय समेत गरिएको थियो । लामो समयसम्म बढुवा नहुँदा प्रहरीमा दैनिक ६ जनाले जागिर छाड्ने गरेका छन् ।

प्रवक्ता कुवँरले भने, “सरकारको पछिल्लो निर्णयबाट खासगरी तल्लो तहका प्रहरी कर्मचारीको मनोबल उच्च हुने अपेक्षा छ । संगठनमा नयाँ गति पैदा हुनेछ । उनीहरुको सेवा–सुविधामा समेत बढोत्तरी हुनेछ । काममा नयाँ ऊर्जा थपिन्छ ।”

प्रहरीको नियमावली संशोधन प्रस्ताव लागु भएसँगै कायम दरबन्दीबाट ३३ प्रतिशत प्रहरी कर्मचारी सहायक हवल्दार हुनेछन् ।

४६ हजार जवानमध्ये १५ हजार बढी जवान सहायक हवल्दार हुनेछन् भने तीन हजार ७०० हवल्दार वरिष्ठ हवल्दारमा र एक हजार बढी सई वरिष्ठ सईमा बढुवा हुनेछन् ।

बढुवा प्रक्रियामा ज्येष्ठता क्रमलाई हेरिनेछ । प्रहरीमा हाल ७६ हजारको दरबन्दी कायम छ । दरबन्दीअनुसारको पूर्ण जनशक्ति भने छैन ।

याे पनि हेर्नुस्
प्रतिक्रिया दिनुहाेस्

Your email address will not be published.