काठमाडौं ।
नेपाली राष्ट्रिय टिमका अलराउन्डर दीपेन्द्रसिंह ऐरीले आईसीसी टी–२० वरियतामा व्यापक सुधार गरेका छन् । अन्तर्राष्ट्रिय क्रिकेट परिषद् (आइसिसी) ले सार्वजनिक गरेको नयाँ वरियतामा उनी अलराउन्डरतर्फ १० औं स्थानमा उक्लिएका हुन् । हालै सकिएको नेपाल, पिएनजी र मलेसियाबीचको त्रिकोणात्मक सिरिजमा उत्कृष्ट प्रदर्शन गरेपछि दीपेन्द्रले वरियतामा व्यापक सुधार गरे ।
दीपेन्द्र १ सय ५२ रेटिङ अंकका साथ नेपाली क्रिकेट इतिहासकै उत्कृष्ट वरियतामा अटाएका हुन् । यसअघि कुनै पनि नेपाल खेलाडी आईसीसी वरियताको शीर्ष १० भित्र अटाएका थिएनन् । यसअघि २०१९ मा टी–२० को अलराउन्डर वरियतामा पूर्वकप्तान पारस खड्का २५ औं स्थानमा पुगेका थिए । अब पारसको सो उपलब्धि दीपेन्द्रले तोडेका छन् ।
ब्याटिङतर्फ दीपेन्द्र ३८ औं स्थानमा छन् । त्यस्तै, कुशल भुर्तेल ३६ औं, आरिफ शेख ९९ औं स्थानमा छन् । टी–२० बलिङतर्फ सन्दीप लामिछाने ३८ औं र अविनाश बोहरा ८६ औं स्थानमा छन् ।
