काठमाडौं।
इंग्ल्याण्डले अष्ट्रेलियामा भएको आठौं संस्करणको आईसीसी टी–२० विश्वकपको उपाधि जितेको छ। आइतबार मेलबर्न क्रिकेट ग्राउन्डमा भएको फाइनल खेलमा पाकिस्तानलाई ५ विकेटले हराउँदै इंग्ल्याण्डले उपाधि उचालेको हो। पाकिस्तानले दिएको १ सय ३८ रनको लक्ष्य इंग्ल्याण्डले १९ ओभरमा ५ विकेट गुमाएर पूरा गर्यो।
उसका जितमा बेन स्टोक्सले अर्धशतकीय पारी खेले। उनले ४९ बलमा ५ चौका र १ छक्काको मद्दतमा नटआउट ५२ रनको योगदान दिए। यस्तै, ह्यारी ब्रुकले २०, मोइन अलीले १९, कप्तान जोस बटलरले १७, फिल साल्टले १० र एलेक्स हेल्सले १ रन बनाए। लियाम लिभिङस्टोन १ रनमा अविजित रहे।
पाकिस्तानका लागि हरिस रउफले २ तथा मोहम्मद वसीम, शादाब खान र शाहीन शाह अफ्रिदीले १–१ विकेट लिए। त्यसअघि टस हारेर ब्याटिङको मौका पाएको पाकिस्तानले निर्धारित २० ओभरमा ८ विकेट गुमाएर १ सय ३७ रन बनाएको थियो । उसका लागि शान मसूदले सर्वाधिक रन बनाए। उनले २८ बलमा २ चौका र १ छक्कासहित सर्वाधिक ३८ रन जोडेका हुन्।
यस्तै, कप्तान बाबर आजमले ३२, शादब खानले २० र मोहम्मद रिजवानले १५ रनको योगदान दिए। मोहम्मद हरिस ८, मोहम्मद वासीम ४, मोहम्मद नवाज ३ तथा इफ्तिखर अहमद शून्य रनमा आउट हुँदा शाहिन शाह अफ्रिदी ५ र हरिस राउफ १ रनमा अविजित रहे।
इंग्ल्याण्डका लागि साम करनले उत्कृष्ट बलिङ गरे। उनले ४ ओभरमा मात्र १२ रन दिँदै महत्वपूर्ण ३ विकेट लिए। उनले रिजवान, मसूद र मोहम्मद जवाजलाई आउट पारेका हुन्। स्पिनर आदिल राशिदले ४ ओभरमा १ मेडनसहित २२ रन खर्चेर २ विकेट हात पारे। क्रिस जोर्डनले ४ ओभरमा २७ रन दिँदै २ विकेट तथा बेन स्टोक्सले ४ ओभरमा ३२ रन खर्चेर १ विकेट झारे।
यससँगै इंग्ल्याण्डले दोस्रोपटक टी–२० विश्वकप जितेको छ। यसअघि इंग्ल्याण्डले सन् २०१० को टी–२० विश्वकप जितेको थियो। वेष्ट इण्डिजमा भएको सो विश्वकपमा उसले फाइनलमा अष्ट्रेलियालाई ७ विकेटले हराएको थियो। यसका साथै इंग्ल्याण्डले वेष्ट इण्डिजको कीर्तिमान बराबर गरेको छ। वेष्ट इण्डिजले सन् २०१२ र २०१६ को टी–२० विश्वकप जितेको थियो।
इंग्ल्याण्डले अफगानिस्तानलाई ५ विकेटले हराएर सुपर १२ को सुरुआत गरेको थियो। दोस्रो खेलमा आयरल्याण्डसँग डीएल पद्दतिमा ५ रनले पराजित इंग्ल्याण्डले तेस्रो खेल घरेलु टोली तथा डिफेन्डिङ च्याम्पियन अष्ट्रेलियासँग वर्षाका कारण खेल्न पाएन। चौथो खेलमा न्यूजिल्याण्डलाई २० रनले पराजित गरेको इंग्ल्याण्डले समूह चरणको अन्तिम खेलमा श्रीलंकालाई ४ विकेटले हराएको थियो। सेमिफाइनलमा इंग्ल्याण्डले भारतलाई १० विकेटले हराएको थियो।
पाकिस्तान भने पहिलो खेलमा भारतसँग ४ विकेट तथा दोस्रो खेलमा जिम्बाब्वेसँग एक रनले अप्रत्यासित हार व्यहारेको थियो। पाकिस्तानले तेस्रो खेलमा नेदरल्यान्ड्सलाई ६ विकेट तथा महत्वपूर्ण मानिएको चौथो खेलमा दक्षिण अफ्रिकालाई डीएल पद्धतिको आधारमा ३३ रनले पराजित गर्यो। समूह चरणको पाँचौं तथा अन्तिम खेलमा बंगलादेशलाई पाँच विकेटले हराएको थियो। पहिलो सेमिफाइनलमा पाकिस्तानले न्यूजिल्याण्डलाई ७ विकेटले पराजित गरेर फाइनलमा पुगेको थियो।
