Khabar Board
Flash logo up side
flash header

विश्वकपअघि नेपालसँग टी २० खेल खेल्न वेस्टइन्डिज पहिलो पटक नेपाल आउने

Nirbachan m

काठमाडौं । टेस्ट टोली वेस्टइन्डिजको ए टोली नेपालसँग पाँच टी २० खेल खेल्न काठमाडौं आउने भएको छ । नेपाल क्रिकेट संघ (क्यान)ले वेस्टइन्डिज पाँच टी-२० खेल खेल्न नेपाल आउने जानकारी दिएको छ ।

Center article

आईसीसी टी-२० विश्वकपको नवौँ संस्करण आगामी जुन १ देखि २९ तारिखसम्म अमेरिका र वेस्ट इन्डिजमा संयुक्त रुपमा आयोजना हुँदैछ । नेपाल र वेस्ट इन्डिज दुवै टी-२० विश्वकपमा छनोट भएका छन् ।

नेपाल क्रिकेट संघ (क्यान) र क्रिकेट वेस्ट इन्डिज दुवैले यो भ्रमण तय गरेका हुन् । वेस्ट इन्डिजको क्रिकेट टोलीले इतिहासमै पहिलो पटक नेपालको भ्रमण गर्न लागेको हो । नेपाल भ्रमणका क्रममा वेस्ट इन्डिजले नेपालसँग पाँचवटा खेलको टी-२० शृङ्खला खेल्ने कार्यक्रम रहेको छ ।

खेल कीर्तिपुरस्थित त्रिवि अन्तर्राष्ट्रिय क्रिकेट मैदानमा खेलिने छ । ‘यो भ्रमणले आगामी विश्वकपको तयारीमा महत्त्वपूर्ण योगदान पुग्ने विश्वास हामीले लिएका छौँ । इन्डियन प्रिमियर लिग खेल्न नपाएका क्यारेबियन खेलाडीका लागि पनि यो विश्वकपको अन्तिम तयारी गर्ने उपयुक्त अवसर हुनेछ,’ क्रिकेट वेस्ट इन्डिजका निर्देशक माइल्स बास्कोम्बेले भनेका छन् ।

क्यानका सचिव पारस खड्काले पनि वेस्ट इन्डिजको टोली नेपाल भ्रमणमा आउँदा विश्वकपको तयारीमा महत्त्वपूर्ण योगदान पुग्ने प्रतिक्रिया दिएका छन् । ‘यो भ्रमणलाई लिएर हामी पनि निकै उत्साही छौँ । विश्वकपको तयारीमा यसले महत्त्वपूर्ण योगदान पुर्‍याउने छ,’ उनले भनेका छन् ।

यसअघि नेपाल र वेस्ट इन्डिजबिच एकपटक मात्र अन्तर्राष्ट्रिय क्रिकेट खेलिएको छ । सन् २०२३ मा जिम्बाबेमा सम्पन्न आईसीसी एकदिवसीय विश्वकपको छनोट प्रतियोगिताका क्रममा नेपाल र वेस्ट इन्डिजबिच खेल भएको थियो । सो खेलमा क्यारेबियन टोली एक सय एक रनले विजयी भएको थियो ।

आगामी आईसीसी टी-२० विश्वकपमा नेपाल समूह ‘डी’ मा परेको छ । उक्त समूहमा दक्षिण अफ्रिका, श्रीलंका, बंगलादेश र नेदरल्यान्ड्स रहेका छन् । वेस्ट इन्डिज भने समूह ‘सी’ मा रहेको छ । उक्त समूहमा न्युजिल्यान्ड, अफगानिस्तान, पपुवा न्यु गिनी र युगान्डा रहेका छन् ।

नेपाल र वेस्ट इन्डिज ‘ए’ बिचको अभ्यास खेल नेपाली समय अनुसार, दिउँसो १ः०० बजे सुरु हुने समाचारमा जनाइएको छ । नेपाल र वेस्ट इन्डिजबिचको पहिलो खेल अप्रिल २७ तारिखमा खेलिने भएको छ ।

यसैगरी दोस्रो खेल अप्रिल २८ तारिखमा र तेस्रो खेल मे १ तारिखमा खेलिने छ । नेपाल र वेस्ट इन्डिजबिचको चौथो खेल मे २ तारिखमा खेलिने भएको छ । पाँचौँ तथा अन्तिम खेल भने मे ४ तारिखमा खेलिने छ ।

याे पनि हेर्नुस्
प्रतिक्रिया दिनुहाेस्

Your email address will not be published.