हेटौंडा/ हेटौँडा उपमहानगरपालिकाले वातावरणीय प्रदूषण नियन्त्रण र स्वदेशी उत्पादनलाई प्रोत्साहन गर्न प्लाष्टिकका फूलमालामाथि पूर्ण प्रतिबन्ध लगाउने निर्णय गरेको छ। उपमहानगरले नगर क्षेत्रमा अबदेखि प्लाष्टिकका फूलको उत्पादन, बिक्री, वितरण र प्रयोग निषेध गरिएको सूचना जारी गरेको हो।
नगरपालिकाको यो निर्णयले केवल बजारको स्वरूप परिवर्तन गर्ने मात्र होइन, स्थानीय फूल उत्पादक किसान र उद्यमीहरूका लागि नयाँ अवसर पनि खोल्ने अपेक्षा गरिएको छ।
उपमहानगरका प्रमुख प्रशासकीय अधिकृत भरत गौतमका अनुसार, प्लाष्टिकका फूलले माटोमा कुहिन नसक्ने भएकाले वातावरणमा दीर्घकालीन असर पार्दै आएको थियो। “हाम्रो दायित्व केवल सुन्दर सहर बनाउनु होइन, पर्यावरणमैत्री जीवनशैलीको अभ्यास गर्नु पनि हो,” गौतमले बताए।
उपमहानगरपालिकाले अब सांस्कृतिक, धार्मिक र सामाजिक कार्यमा स्वदेशी फूलमालाको प्रयोग गर्न सर्वसाधारणलाई आग्रह गरेको छ। सूचनाविपरीत प्लाष्टिकका फूल बेच्ने वा प्रयोग गर्ने भेटिएमा कारबाही हुने चेतावनीसमेत दिइएको छ।
स्थानीय बासिन्दाहरूले यो निर्णयलाई स्वागत गर्दै ‘हरित हेटौँडा अभियानको सुरुवात’ भनेर अभिव्यक्ति दिएका छन्। उनीहरूका अनुसार, यस कदमले बजारमा ताजा फूलको माग बढ्ने र स्थानीय स्तरमा फूल खेतीमा रुचि बढ्ने सम्भावना छ।

















