हेटौंडा/ सेवा, सहयोग र आवाज संस्थाका अध्यक्ष महतले सामाजिक सञ्जालमा सार्वजनिक गरेको स्टाटसमा उल्लेख गरेका छन् कि चालाक, स्वार्थी र फटाहा प्रवृत्तिहरूले अस्थायी सफलता पाउन सक्छन्, तर त्यसको मूल्य अन्ततः सम्पूर्ण समाजले तिर्नुपर्ने हुन्छ।
महतले धर्मग्रन्थमा उल्लेखित चार युगमध्ये कलियुगलाई अन्तिम युगको रूपमा व्याख्या गर्दै यस युगमा धर्म कमजोर हुने र सत्यभन्दा चालाकी हावी हुने बताएका छन्। उनका अनुसार सत्य, धैर्य र न्यायको मार्गमा हिँड्नेहरू प्रायः एक्लिन्छन्, जबकि मीठा बोली, खोक्रा वाचा र सजिला आश्वासन दिनेहरूले भीडको समर्थन पाउँछन्।
सन्देशलाई अझ स्पष्ट गर्न उनले एउटा रूपक कथा पनि प्रस्तुत गरेका छन्। कथामा देखाइयो कि चालाक व्यक्तिले तत्काल समाधानको भ्रम सिर्जना गरी सत्ता प्राप्त गरे पनि राज्य अन्ततः अन्याय र अव्यवस्थाले भरिन्छ। यसै सन्दर्भमा महतले चेतावनी दिएका छन् कि सत्य दबाइए समाज दीर्घकालीन संकटतर्फ धकेलिनेछ।
अन्त्यमा महतले कलियुगमा सत्यको पराजय भएको जस्तो देखिए पनि धर्मको कसीमा सत्य अमर रहने बताए र समाजलाई विवेक, धैर्य र सत्यको पक्षमा उभिन आह्वान गरेका छन्।
विशेषत: उनले अहिलेको समाजमा देखिने अस्थायी जितभन्दा दीर्घकालीन मूल्य र नैतिकताको खाँचोलाई महत्व दिनुपर्ने जोड दिएका छन्।
