हेटौंडा/ हेटौँडामा पूर्वप्रधानमन्त्री पुष्पकमल दाहाल प्रचण्डको फोटो जलाउने कार्यमा संलग्न रहेको आरोपमा राष्ट्रिय प्रजातान्त्रिक युवा सङ्गठन केन्द्रीय समितिका सचिव निराजन बमलाई प्रहरीले पक्राउ गरेको छ। उनलाई भरतपुर विमानस्थलबाट पक्राउ गरिएको जिल्ला प्रहरी कार्यालय मकवानपुरले जनाएको छ।
प्रहरीका अनुसार पूर्वप्रधानमन्त्रीको फोटो जलाउनु आपराधिक क्रियाकलाप भएकाले पक्राउ गरिएको हो। हेटौँडामा राष्ट्रिय प्रजातान्त्रिक युवा सङ्गठन मकवानपुरको अधिवेशन उद्घाटन कार्यक्रममा संघीय सांसद दीपकबहादुर सिंहको उपस्थिति रहेको अवस्थामा बमले पूर्वप्रधानमन्त्री प्रचण्डको फोटो जलाएका थिए।
बमको पक्राउलाई लिएर राष्ट्रिय प्रजातान्त्रिक युवा सङ्गठनले विज्ञप्ति निकाल्दै सरकारमाथि नागरिकको वैयक्तिक स्वतन्त्रता अवरोध गरेको आरोप लगाएको छ। संगठनले यस कदमलाई लोकतान्त्रिक मूल्य र मान्यताका विरुद्ध भएको बताएको छ।
यसैबीच, माओवादी केन्द्रका अध्यक्ष पुष्पकमल दाहाल प्रचण्डले फोटो जलाउने कार्यमा पक्राउ पर्नु उचित नहुने धारणा व्यक्त गर्नुभएको छ। उहाँले सामाजिक सञ्जाल फेसबुकमा लेख्दै भन्नुभएको छ, ‘लोकतन्त्रमा विरोधका विभिन्न रूप हुन्छन्। फोटो जलाउँदैमा गिरफ्तार गर्नु उचित हुँदैन।’
यो घटनाले विरोध प्रदर्शनको स्वतन्त्रता र राज्यको प्रतिक्रिया कसरी सन्तुलन गर्नुपर्छ भन्ने बहसलाई तातो बनाएको छ।
