रौतहटमा कार र मोटरसाइकल ठोक्किँदा बाबुछोरीको दर्दनाक मृत्यु

Image

हेटौंडा/ दुःखदायी घटना रौतहटको चन्द्रपुर नगरपालिका–४ मा आज बिहान एक कार र मोटरसाइकल आपसमा ठोक्किँदा बाबुछोरीको ज्यान गएको छ। पूर्वपश्चिम लोकमार्ग अन्तर्गत पश्चिम लच्का नजिकै भएको यो दुर्घटनामा गम्भीर घाइते भएका बाबु र छोरीको उपचारको क्रममा मृत्यु भएको हो।

हेटौँडाबाट चन्द्रपुरतर्फ गइरहेको बा ६ च ३५२६ नम्बरको कारले निजगढतर्फ जाँदै गरेको ना ३ प ९५१२ नम्बरको मोटरसाइकललाई बिहान ठक्कर दिएको थियो। कारको ठक्करबाट मोटरसाइकल चालक, गरुडा नगरपालिका–३ मलाहिटोलका ६० वर्षीय बलिराम सहनी गम्भीर घाइते भएका थिए। उनको दाहिने खुट्टा, ढाड र अन्डकोषमा चोट लागेपछि चन्द्रपुरस्थित हाइवे ट्रमा सेन्टरमा उपचारका क्रममा मृत्यु भएको जिल्ला प्रहरी कार्यालयले जनाएको छ।

त्यस्तै, मोटरसाइकलको पछाडि सवार बलिरामकी ४० वर्षीया छोरी उर्मिला देवी सहनीको पनि दाहिने हात र ढाडमा गम्भीर चोट लागेको थियो। प्रारम्भिक उपचारपछि उनलाई थप उपचारका लागि बारास्थित एलएस न्युरो अस्पताल पठाइएको थियो। तर, बिहान ९ बजे चिकित्सकहरूले उनलाई मृत घोषणा गरेका हुन्।

प्रहरीले घटनाबारे थप अनुसन्धान गरिरहेको जनाएको छ। यस घटनाले सडक सुरक्षा र सावधानीको आवश्यकता पुनः उजागर गरेको छ।