हेटौंडा/ हेटौंडा नगर स्तरीय शैक्षिक समन्वय समिति हेटौंडाले हेटौंडा नगर स्तरीय महिला शिक्षक तथा कर्मचारी मैत्रीपूर्ण भलिबल प्रतियोगिता आयोजना गर्ने भएको छ। प्रतियोगिता फागुन १६ र १७ गतेसम्म सञ्चालन हुनेछ। प्रतियोगितामा हेटौंडा नगरका १० विद्यालयका टिम सहभागी हुने प्रतियोगिता संयोजक बालकुमार श्रेष्ठले जानकारी दिनुभयो।
नगरस्तरीय शैक्षिक समन्वय समितिले बिहीबार पत्रकार सम्मेलनको आयोजना गरी प्रतियोगिता सम्बन्धी जानकारी गराएको हो। हेटौंडा–४ स्थित आधुनिक माविको खेलमैदानमा आयोजना हुने प्रतियोगितामा प्रथम, द्वितीय र तृतीय स्थान हासिल गर्ने टिमलाई क्रमशः ७ हजार, ५ हजार र ३ हजार नगदसहित मेडल तथा प्रमाणपत्र प्रदान गरिनेछ। प्रतियोगिताको उद्घाटन हेटौंडा उपमहानगरपालिकाकी मेयर मीनाकुमारी लामाले गर्नु हुनेछ भने उद्घाटन खेल सिद्धार्थ मावि र ज्योति माविबीच हुने जनाइएको छ।
नगरस्तरीय शैक्षिक समन्वय समितिका अध्यक्ष भोगेन्द्र लुइँटेलले शिक्षणसँगै अतिरिक्त क्रियाकलापमा महिला सहभागिता वृद्धि गर्दै सामुदायिक विद्यालयको शैक्षिक गुणस्तर सुधार गर्ने उद्देश्यले प्रतियोगिता आयोजना गरिएको जानकारी गराउनुभयो।
पत्रकार सम्मेलनमा प्रतियोगिताको खेल तालिका (टाइसिट) सार्वजनिक गरिएको छ। प्रतियोगितामा निम्न विद्यालयका टिम सहभागी हुनेछन्:
• श्रीकृष्ण आधारभूत विद्यालय (हेटौंडा–६)
• सिद्धान्त मावि (हेटौंडा–२)
• वंशीगोपाल मावि (हेटौंडा–६)
• भूटनदेवी मावि (हेटौंडा–४)
• आधुनिक मावि (हेटौंडा–४)
• त्रिभुवन मावि (हेटौंडा–११)
• ज्योति मावि (हेटौंडा–१८)
• जनप्रिय मावि (हेटौंडा–१६)
• प्रगति मावि (हेटौंडा–९)
यस प्रतियोगिताले महिलाहरूको खेलकुदमा सहभागिता वृद्धि गर्नुका साथै विद्यालयहरूबीच आपसी सहकार्य र खेल भावना विकास गर्ने अवसर प्रदान गर्ने अपेक्षा गरिएको छ।

















