काठमाडौं।
इंग्ल्याण्डसँगको टी–२० सिरिज पाहुना टोली भारतले जितेको छ। बर्मिङ्म क्रिकेट स्टेडियममा भएको दोस्रो म्याचमा इंग्ल्याण्डलाई ४९ रनले हराउँदै एक अगावै २–० ले सिरिज जितेको हो। भारतले दिएके १ सय ७१ रनको लक्ष्य पछ्याएको इंग्ल्याण्डले १७ ओभरमा सबै विकेट गुमाएर १ सय २१ रन मात्रै बनाउन सक्यो।
उसका लागि मोइन अलीले ३५, डेभिड विलीले नटआउट ३३, डेविड मलानले १९ र लियाम लिभिङस्टोनले १५ रन बनाए। ह्यारी ब्रुक ८, कप्तान जोस बटलरले ४, साम करन, रिचर्ड ग्लेसन २–२, क्रिस जोर्डन १, जेसन रोय र म्याट पार्किन्सन शून्य रनमा आउट भए।
भारतका लागि भुवनेश्वर कुमारले ३, जसप्रित बुमराह र युजवेन्द्र चहलले २–२ तथा हर्षल पटेल र हार्दिक पाण्ड्याले १–१ विकेट लिए। त्यसअघि टस हारेर पहिले ब्याटिङको मौका पाएको भारतले निर्धारित २० ओभरमा ८ विकेट गुमाएर १ सय ७० रन बनाएको थियो।
उसका लागि रवीन्द्र जडेजाले सर्वाधिक रन बनाए। उनले २९ बलमा ४ चौकासहित ४६ रनको योगदान दिए। यस्तै, कप्तान रोहित शर्माले ३१, ऋषभ पन्तले २६, सूर्यकुमार यादवले १५, हर्षल पटेलले १३, हार्दिक पाण्ड्या र दिनेश कार्तिकले १२–१२ रन बनाए। भुवनेश्वर कुमार २ र विराट कोहली १ रनमा आउट भए।
इंग्ल्याण्डका लागि क्रिस जोर्डनले सर्वाधिक ४ विकेट लिए। डेब्यू खेलाडी रिचर्ड ग्लेसनले ३ विकेट हात पारे। ग्लेसनले ४ ओभरमा मात्र १५ रन दिए। उनले एक ओभर मेडन राखे। भारत र इंग्ल्याण्डबीचको तेस्रो तथा अन्तिम म्याच आइतबार नटिङ्घममा हुनेछ।
