काठमाडौं
इण्डियन प्रिमियर लिग (आईपीएल) टिम चेन्नई सुपर किंग्स (सिएसके) का कप्तान महेन्द्रसिंह धोनीले पद त्याग गरेका छन् । उनले आईपीएल सुरु हुनु दुई दिनअघि टिमको कप्तानी नगर्ने निर्णय गरेका हुन् । धोनीले यस्तो निर्णय लिएसँगै अलराउन्डर रवीन्द्र जडेजाले चेन्नईको कप्तानी गर्ने भएका छन् ।
जडेजा सन् २०१२ देखि चेन्नई सुपर किंग्सको महत्वपूर्ण सदस्यको रूपमा रहेका छन् । उनी चेन्नईका तेस्रो कप्तान हुन् । कप्तान पद हस्तान्तरण गरे पनि धोनीले यो सिजन र पछि पनि चेन्नईबाटै खेल्ने टिमले जनाएको छ ।
छोराले आईपीएल खेल्न भिसा नपाएपछि यस्तो भन्छन् मोइन अलीका बुबा
लोकप्रिय अलराउन्डर मोइन अली आईपीएल २०२२ मा चेन्नई सुपर किंग्स (सीएसके) ले सुरुवाती खेल गुमाउने भएका छन् । उनले भिसा समस्याका कारण आईपीएलको सुरुवाती खेल गुमाउने भएका हुन् ।
समयमै भिसा नपाएका कारण मोइनले १५ औं सिजनको आईपीएलको पहिलो खेल गुमाउने विभिन्न अन्तर्राष्ट्रिय सञ्चारमाध्यमले जनाएका छन् । चेन्नई सुपर किंग्सका सीईओ केएस विश्वनाथनले पनि यो कुराको पुष्टि गरेका छन् ।
उता मोइनका बुबा मुनिर अलीले छोराले भिसा नपाएकोमा असन्तुष्टि व्यक्त गरेका छन् । ‘मोइन अलीले भारतमा धेरैपटक खेलिसकेका छन्, त्यसैले उनको भिसा किन हालसम्म क्लियर भएको छैन भन्ने हामीले बुझेका छैनौं । छिट्टै भिसा पाउने आशा छ,’ मोइनका बुबा मुनिरले भनेका छन् ।
मोइनले २८ फेब्रुअरीमा भिसाका लागि आवेदन दिएका थिए । तर प्रमाणिकरण प्रक्रियामा ढिलाइ भएपछि उनको मुद्दा अलपत्र परेको थियो । जसका कारण मोइल अब २६ मार्चमा केकेआरविरुद्ध हुने पहिलो खेलमा सहभागी हुने छैनन् । उनी दोस्रो खेलमा उपलब्ध हुने अपेक्षा गरिएको छ ।
गत वर्ष चेन्नई र केकेआरले आईपीएलमा फाइनल खेलेका थिए । यसपटक चेन्नईको टोलीको लक्ष्य उपाधि रक्षा गर्ने हुनेछ । मोइनलाई लिलामी अघि चेन्नईले रिटेन गरेको थियो ।
