काठमाडौं ।
एकदिवसीय सिरिजको दोस्रो खेलमा घरेलु टोली नेपालले दिएको २७९ रनको लक्ष्य पछ्याइरहेको पपुवा न्यूगिनी (पिएनजी) ले तेस्रो विकेट गुमाएको छ । उसले तेस्रो विकेटको रूपमा चार्ल्स अमिनीलाई गुमाएको हो ।
उनी सन्दीप लामिछानेको बलमा एल्बीडब्लू आउट भएका हुन पुगे । अमिनीले लेगा सियाकासँग शानदार ब्याटिङ गरिरहेका थिए । उनले ३० बलमा ७ चौकाको मद्दतमा ३५ रनको उत्कृष्ट पारी खेले । पिएनजीले पहिलोविकेटको रूपमा टोनी उरालाई ९ र दोस्रो विकेटको रूपमा कप्तान असद भालालाई शून्यमा गुमाउन पुग्यो ।
उनीहरू दुवैलाई सोमपाल कामीले आउट गरेका हुन् । यो समाचार तयार पार्दासम्म पिएनजीले १४ ओभरमा ३ विकेट गुमाएर ८६ रन बनाएको छ । त्यसअघि, कीर्तिपुरस्थित त्रिवि क्रिकेट मैदानमा टस जितेर ब्याटिङ रोजेको नेपालले निर्धारित ५० ओभरमा ८ विकेट गुमाएर २७८ रन बनायो ।
नेपालका लागि दीपेन्द्रसिंह ऐरीले शतकीय पारी खेले । उनले १४० बलमा सात चौकासहित १०५ रन बनाए । उनले एकदिवसीय क्रिकेटमा दीपेन्द्रको यो पहिलो शतक हो ।
साथै, उनी यो प्रारूपमा शतक बनाउने तेस्रो नेपाली ब्याटर पनि बनेका छन् । यसअघि नेपालकोतर्फबाट एकदिवसीय क्रिकेटमा पारस खड्का (११५) र रोहितकुमार पौडेल (१२६ रन) ले शतक बनाइसकेका छन् । पछिल्लो समय खासै लयमा नदेखिएका ऐरीले आज भने उत्कृष्ट ब्याटिङ गरे ।
त्यस्तै, देवले ८६ बलमा चार चौका र तीन छक्काको मद्दतमा ७२ रनको पारी खेले । शुक्रबार डेब्यूमा शून्यमै आउट भए पनि उनले आज भने शानदार कमब्याक गरे । रोहितकुमार पौडेल ३५, भीम सार्की २६, आरिफ शेख चार, अनिलकुमार साह एक, कुशल भुर्तेल र पवन सर्राफ शून्यमा आउट भए ।
कप्तान सन्दीप लामिछानेले अन्तिममा आक्रामक पारी खेले । उनले ९ बलमा २ चौका र एक छक्कासहित अविजित २४ रन बनाए । त्यस्तै, सोमपाल कामी ३ रनमा नटआउट रहे । पिएनजीका अलि नाओले तीन, नर्मन भानुआले दुई, चार्ल्स अमिनी र चाड सोपरले एक/एक विकेट लिए ।
सन्दीपले रचे इतिहास
नेपाली क्रिकेट टिमका कप्तान सन्दीप लामिछानेले इतिहास रचेका छन् । उनले एकदिवसीय क्रिकेटमा ५० विकेट लिने पहिलो नेपाली बलर बन्दै इतिहास रचेका हुन् । सन्दीपले यो उपलब्धि आज जारी पिएनजीसँग खेलमा एक विकेट लिएसँगै हासिल गरे ।
सन्दीपले २२ खेलमा वानडेमा ५० विकेट पूरा गरे । उनी नेपालबाट यो प्रारूपमा ५० विकेट लिने पहिलो बलर हुन् । साथै, सन्दीप टी–२० मा सर्वाधिक विकेट लिने नेपाली बलर पनि हुन् । उनले टी–२० मा हालसम्म ३४ खेलमा ६२ विकेट लिएका छन् ।
देव र दीपेन्द्रले बनाए कीर्तिमान
देव खनाल र दीपेन्द्रसिंह ऐरीले नयाँ कीर्तिमान बनाएका छन् । उनीहरूले नेपालको तर्फबाट एकदिवसीय अन्तर्राष्ट्रिय क्रिकेटमा सर्वाधिक ठूलो साझेदारी गर्ने कीर्तिमान बनाएका हुन् । खनाल र ऐरीबीच १२९ रनको साझेदारी भयो ।
उनीहरूले पिएनजीसँगको वानडे सिरिजको दोस्रो खेलमा यो साझेदारी गरेका हुन् । जुन एकदिवसीयमा नेपालबाट बनेको कुनै पनि विकेटका लागि उच्च साझेदारी (१२९ रन) हो । यसअघि शुक्रबार पपुवा न्यूगिनीविरुद्ध नै आरिफ शेख र रोहितकुमार पौडेलले १ सय ४ रनको शतकीय साझेदारी गरेका थिए ।
दुई खेलको सिरिजमा पाहुना टोली पिएनजी १–० ले अघि छ । सिरिज बराबर गर्न नेपालले आजको खेल जित्नैपर्ने हुन्छ । शुक्रबार भएको पहिलो खेलमा नेपाल ६ रनले पराजित भएको थियो ।
