एजेन्सी । वेस्ट इन्डिजका तिब्रगतिका बलर अल्जारी जोसेफ दुई खेलको निलम्बनमा परेका छन् । इङ्ल्यान्डविरुद्धको तेस्रो तथा अन्तिम एकदिवसीय खेलका क्रममा अनुशासन विपरितको कार्य गरेको आरोपमा उनलाई निलम्बन गरिएको हो ।
इङ्ल्यान्डविरुद्धको एकदिवसीय शृंखला भने वेस्ट इन्डिजले २–१ ले जितेको थियो । तेस्रो खेलका क्रममा २७ वर्षीय दायाँहाते बलरले आफ्ना कप्तान साई होपसँग चर्को विवाद गरेका थिए । बार्बाडोसमा खेलिएको उक्त खेलमा फिल्डिङ पोजिसनको विषयलाई लिएर जोसेफले कप्तानसँग विवाद गरेका थिए ।
खेलका क्रममा उत्कृष्ट बलिङ गर्दै जोसेफले विकेट पनि लिएका थिए । त्यसपछि कप्तान होपसँग उनको विवाद भएको थियो । विवादपछि निकै आक्रोसित देखिएका जोसेफ कसैलाई नभनी मैदान छाडेर ड्रेसिङ रुमतर्फ हिँडेका थिए ।
सोही कारणले वेस्ट इन्डिजले केही समय १० खेलाडीमा सिमित भएर फिल्डिङ गर्नु परेको थियो । सोही कारणले वेस्ट इन्डिज क्रिकेट बोर्डले जोसेफलाई आगामी दुई खेल खेल्न नपाउने गरी निलम्बन गरेको हो । बोर्डले जोसेफको वयवहार अशोभनीय भएको प्रतिक्रिया पनि दिएको छ।
यद्दपि, जोसेफले आफ्नो अस्वभाविक व्यवहारका लागि सार्वजनिक रुपमै माफी मागिसकेका छन् । ‘म कप्तान साई होप र टोलीका अन्य साथीहरुसँग माफी माग्न चाहन्छु । म समर्थकहरुसँग पनि क्षमा याचना गर्न चाहन्छु । म आफ्नो व्वहारबाट लज्जित पनि छु,’ उनले भनेका छन् ।

















