काठमाडौं ।
नेपाल एक खेल अगावै घरेलु मैदानमा जारी टी–२० त्रिकोणात्मक सिरिजको फाइनलमा प्रवेश गरेको छ । आज भएको आफ्नो तेस्रो खेलमा पपुवा न्यूगिनी (पिएनजी) लाई ३७ रनले हराउँदै नेपाल फाइनलमा प्रवेश गरेको हो । साथै, नेपालको यो ऐतिहासिक जित पनि हो ।
यसअघि नेपालले टी–२० मा पिएनजीलाई यति फराकिलो अन्तरले हराउन सकेको थिएन । त्यस्तै, आज नेपालकाे लागि याे ५० औं टी–२० अन्तर्राष्ट्रिय म्याच पनि थियाे । आफ्नो ऐतिहासिक खेलमा नेपालले उत्कृष्ट खेल्यो ।
पिएनजीले भने सिरिजमा लगातार तेस्रो हार बेहोरेको छ । आफ्नो तेस्रो खेलमा नेपालले दिएको २०४ रनको लक्ष्य पछ्याएको पिएनजीले १९.४ ओभरमा सबै विकेट गुमाएर १६६ रन मात्र बनाउन सक्यो । उसका लागि चाल्स अमिनीले ६२, टोनी उमराले ४३, सेसे बाउले २५ र नोर्मन भानुआले १७ रन बनाए ।
बलिङमा करण केसीले ह्याट्रिक लिए । उनले अन्तिम ओभरमा चाड सोपर, साइमन अताइ र नौसेना पोकनालाई आउट गर्दै ह्याट्रिक पूरा गरे । उनले ३.४ ओभरमा २१ रन दिएर कूल ५ विकेट लिए । टी–२० मा करणको यो हालसम्मकै उच्च बलिङ प्रदर्शन पनि हो ।
त्यस्तै, सोमपाल कामी, अविनाश बोहराले दुई/दुई र कप्तान सन्दीप लामिछानेले एक विकेट हात पारे । त्यसअघि कीर्तिपुरस्थित त्रिवि मैदानमा टस हारेर ब्याटिङको मौका पाएको नेपालले निर्धारित २० ओभरमा ७ विकेट गुमाएर २०३ रन बनायो ।
नेपालका लागि दीपेन्द्रसिंह ऐरीले उत्कृष्ट पारी खेले । चौथो अर्धशतक बनाउने क्रममा उनले ३३ बलमा चार छक्का र तीन चौकासहित ६६ रनको योगदान दिए । योसँगै दीपेन्द्रले नेपालको तर्फबाट टी–२० मा सर्वाधिक अर्धशतक बनाउने मामलामा पूर्वकप्तान पारस खड्काको रेकर्ड बराबर पनि गरेका छन् ।
पारसले पनि यो प्रारूपमा ४ अर्धशतक बनाएका छन् । टी–२० मा सर्वाधिक अर्धशतक बनाउने नेपाली ब्याटरको शीर्षमा भने कुशल भुर्तेल छन् । उनले हालसम्म सर्वाधिक ५ अर्धशतकीय पारी खेलेका छन् ।
त्यस्तै, आज डेब्यू गरेका आदिल अन्सारीले पनि शानदार पारी खेले । उनले ११ बलमा एक चौका र तीन छक्कासहित ३१ रनको योगदान दिए । रोहितकुमार पौडेलले पनि शानदार ब्याटिङ गरे । उनले २३ बलमा चार चौका र दुई छक्काको सहयोगमा ४१ रन बनाए ।
आसिफ शेखले २९ बलमा चार चौका र एक छक्कासहित ३८ रनको योगदान दिए । २१ बलको सामना गरेका कुशल भुर्तेल १७ रनमा आउट भए । उनले त्यसक्रममा दुई चौका हिर्काए ।
करण केसी एक र दिलिप नाथ भने शून्यमै आउट भए । पिएनजीका काबुआ मोरियाले तीन, रिले हेकुरेले दुई, नौसेना पोक्वाना र नोमर्न भानुआले एक/एक विकेट लिए ।
एक खेल अगावै सिरिजको फाइनल पुगेपछि यस्तो भन्छन् सन्दीप
नेपाली टिमका कप्तान सन्दीप लामिछानेले टोली एक खेल अगावै सिरिजको फाइनल पुग्नमा सबै खेलाडीको महत्वपूर्ण भूमिका रहेको प्रतिक्रिया दिएका छन् । ‘यो उपलब्धिमा सबै खेलाडी अहम् भूमिका छ । विशेष गरी तेस्रो खेलमा धेरै खेलाडी प्रदर्शन उत्कृष्ट रह्यो । नतिजाप्रति म असाध्यै खुसी छु,’ म्याच सकिएपछि उनले भने ।
साथै, सन्दीपले करण केसी, मोहम्मद आदिल आलम, दीपेन्द्रसिंह ऐरी, अविनाश बोहरा र आसिफ शेखको खुलेरै प्रशंसा गरे ।
‘ब्याटिङमा मोहम्मद आदिल आलम, दीपेन्द्र, आसिफको ब्याटिङ उत्कृष्ट रह्यो । उनीहरूको प्रदर्शनले म निकै खुसी छु,’ सन्दीपले भने, ‘बलिङमा करण, अविनाश दाइहरूको प्रदर्शन उत्कृष्ट रह्यो । समग्रमा आजको खेलमा हामीले राम्रो गर्न सक्यौं ।’
