काठमाडौं ।
इंग्ल्याण्डमा जारी काउन्टी च्याम्पियनसिपमा स्टार अलराउन्डर बेन स्टोक्सले एक ओभरमा लगातार पाँच छक्का हिर्काएका छन् । डरहमबाट प्रतियोगिता खेलिरहेका उनले आज वर्सेस्टरशायरविरुद्ध लगातार पाँच छक्का हिर्काएका हुन् ।
स्टोक्सले ११७ औं ओभरमा जोश बेकरको बलमा यो उपलब्धि हासिल गरे । उनले पहिलोदेखि पाँच बलसम्म छक्का र अन्तिम बलमा चौका हिर्काउँदै एक ओभरमा कूल ३४ रन जोडे । दोस्रो दिनको खेल सकिँन अझै ५० ओभर बाँकी रहेको अवस्थामा स्टाक्सले शानदार ब्याटिङ गरेका छन् ।
उनले यो समाचार तयार पार्दासम्म ८६ बलमा १७ छक्का र आठ चौकासहित १६१ रन बनाएर खेलिरहेका छन् । अर्को एन्डबाट खेलिरहेका डेभिड बेडिङहम १२८ रनमा अविजित छन् । त्यस्तै, सेन डिक्सन १०४, कप्तान स्कट बोर्थविक ८९, कीगन पीटरसन ५० र एलेक्स लीस २७ रन बनाएर आउट भएका छन् ।
खेलको दोस्रो दिनसम्म डरहमले १२५ ओभर खेल्दा चार विकेट गुमाएर ५७२ रन बनाइसकेको छ ।