काठमाडौं । राजस्थान रोयल्स लखनउ सुपर जायन्टस्लाई हराउँदै १७ औं संस्करणको ईन्डियन प्रिमियर लिग(आईपीएल) मा विजयी सुरुआत गरेको छ ।
घरेलु मैदान सवाईमासिंह क्रिकेट स्टेडियममा सिजनको पहिलो खेल जित्ने क्रममा राजस्थान २० रनले विजयी भयो ।
राजस्थानले दिएको १ सय ९४ रनको लक्ष्य पछ्याएको लखनउले निर्धारित २० ओभरमा ६ विकेट गुमाएर १ सय ७३ रन मात्र बनायो ।
लखनउका लागि केएल राहुल र निकोलस पुरनले अर्धशतकीय ईनिङ खेले । ओपनर तथा कप्तान राहुलले ४४ बलमा ४ चौका र २ छक्काको सहयोगमा ५८ रन बनाए । पुरनले ४१ बलमा ४ चौका र ४ छक्काको सहयोगमा अविजित ६४ रन बनाए । दिपक होडाले १३ बलमा २ चौका र २ छक्काको सहयोगमा २६ रन बनाए ।
राजस्थानका लागि ट्रेन्ट बोल्डले २ तथा नान्द्रे बर्गर, रविचन्द्रन आश्विन, सन्दीप शर्मा र युजभेन्द्र चहलले समान १ विकेट लिए ।
त्यसअघि टस जितेर ब्याटिङ गरेको राजस्थानले निर्धारित २० ओभरमा ४ विकेट गुमाएर १ सय ९३ रन बनाएको थियो ।
राजस्थानका लागि कप्तान सन्जु सामसनले ५२ बलमा ३ चौका र ६ छक्काको सहयोगमा अविजित ८२ रनको अर्धशतकीय ईनिङ खेले । सामसनले तेस्रो विकेटका लागि रियान परागसँग मिलेर ९३ रनको साझेदारी गरेका थिए । सोही साझेदारीले नै टोलीलाई सम्मानजनक योगफलसम्म पुग्न सहयोग गर्यो । परागले २९ बलमा १ चौका र ३ छक्काको सहयोगमा ४३ रन बनाए ।
ओपनर यशस्वी जयसवाले १२ बलमा ३ चौका र १ छक्काको सहयोगमा २४ रन बनाए । अर्का ओपनर जोस बटलरले ९ बलमा ११ रन मात्र जोड्न सके । शिमरन हिटमायरले ५ रन मात्र बनाए । धुव्र जुरेलले १२ बलमा अविजित २० रन बनाए ।
लखनउका लागि नभिन उल हकले २ तथा रवि विश्नोइ र मोहसिन खानले समान १ विकेट लिए ।
