काठमाडौं । कप्तान सलिम अल दौसारीको उत्कृष्ट प्रदर्शनप्रेरित अल हिलालले एएफसी च्याम्पियन्स लिग इलिटमा घरेलु टोली अल ऐन एफसीविरुद्ध ५-४ को रोमाञ्चक जित निकालेको छ । लगातार तेस्रो जितसँगै तीन खेलमा ९ अंक जोडेको अल हिलाल शीर्ष स्थानमा छ ।
पराजित अल ऐन समान खेलबाट एक अंकका साथ ११औं स्थानमा छ । हजा बिन जायद रंगशालामा अल हिलालाई जित दिलाउन दौसारीले ह्याट्रिक गर्दा रेनान रोडी र सेर्जी मिलान्कोभिच साभिचले समान एक गोल थपे । अल ऐनका लागि सोफियान रहिमीले ह्याट्रिक गर्दा माटियो सन्बरियालेले एक गोल थपे ।
खेलको २६औं मिनेटमा लोडीको गोलमार्फत अल हिलालले अग्रता लिएको थियो । ३९औं मिनेटमा रहिमीले अल ऐनलाई बराबरीमा ल्याए ।पहिलो हाफको इन्जुरी समयमा साभिचले गोल गर्दा अल हिलाल २-१ ले अगाडि बढ्यो । इन्जुरी समयमै दौसारीले टोलीका लागि तेस्रो गोल गरे।
सन्बरियाले ६३औं मिनेटमा गोल गर्दा खेल ३-२ को स्थितीमा आयो । दुई मिनेटपछि नै दौसारीले व्यक्तिगत दोस्रो गोल गर्दै अल हिलालको अग्रता ४-२ मा पुर्याए ।
रहिमीले ६७औं मिनेटमा व्यक्तिगत दोस्रो गोल गर्दै अल ऐनलाई खेलमा फर्काउने संकेत दिएका थिए । तर ७५औं मिनेटमा दौसारीले ह्याट्रिक पूरा गर्दै टोलीको अग्रता ५-३ को बनाए । ब्राजिलियन स्टार नेयमार ७७औं मिनेटमा दौसारीको स्थानमा मैदान प्रवेश गरेका थिए । उनले एक वर्षपछि पुनरागमन गरे ।
अलि अल्बुलायहीले रातो कार्ड ब्यहोर्दै मैदान छाडेपछि अल हिलाल १० खेलाडीमा समेटिएको थियो । खेलको इन्जुरी समयमा रहिमीले पेनाल्टीमार्फत ह्याट्रिक पूरा गर्दै अल ऐनलाई खेलमा फर्काउने प्रयास गरे पनि त्यो पर्याप्त बन्न सकेन ।
