काठमाडौँ । विश्व फुटबल महासंघ (फिफा) ले ‘फिफा वर्ष खेलाडी अवार्ड’ को मनोनयनमा पर्न सफल खेलाडीहरूको नाम सार्वजनिक गरेको छ । लामो अनिश्चिततापछि फिफाले सार्वजनिक गरेको सम्भावित विजेताको सूचिमा समकालीन विश्व फुटबलका महान खेलाडीमध्येका एक लियोनल मेस्सीको नाम पनि समावेश गरिएको छ ।
अमेरिकाको मेजर लिग सकर (एमएसएल) क्लब इन्टर मायमीमा हात पारेको उपलब्धि र अर्जेन्टिनासँग जितेको कोपा अमेरिकाको उपाधिले मेसीलाई उत्कृष्ट ११ पुरुष फुटबलरको सूचीमा उभ्याएको हो।
तथ्यांक र उपलब्धिमा उनको करिअरसँग तुलना गर्दै आएका पोर्चुगिज स्टार क्रिस्टियानो रोनाल्डो भने मनोनयनमा परेनन्। उनी साउदी अरेबियन क्लब अल नासरमा खेलिरहेका छन्।
कीर्तिमानी रुपमा आठपटक बालोन डी’ओर अवार्ड जितिसकेका अर्जेन्टिनी स्टार मेस्सी हाल अमेरिकी क्लब इन्टर मियामीबाट व्यावसायिक फुटबल खेल्छन् ।
मनोनयनमा पर्न सफल खेलाडीहरूको सूचिमा भिनिसियस जुनियर र रोड्री पनि रहेका छन् । यसका अतिरिक्त जुड बेलिङ्घम र डानी कार्भाजललाई पनि मनोनयनमा समावेश गरिएको छ ।
यसैगरी, अर्लिङ हालान्ड, टोनी क्रुस, केलियन एमबाप्पे, फेड्रिको भल्भेर्ड र लामिन यामललाई पनि मनोनयनको सूचिमा समावेश गरिएको छ । अघिल्लो दुई संस्करणको अवार्ड मेस्सीले जितेका थिए ।
