हेटौंडा/ विश्व वातावरण दिवस २०८२ को अवसरमा हेटौंडा उपमहानगरपालिका–८ स्थित चन्द्रोदय माध्यमिक विद्यालय परिसरमा वृक्षारोपण कार्यक्रम सम्पन्न गरिएको छ। वातावरण संरक्षण तथा हरियाली प्रवर्द्धन गर्ने उद्देश्यले आयोजित उक्त कार्यक्रममा निम, अमला, मसला लगायतका विभिन्न प्रजातिका बिरुवाहरू रोपिएका छन्।
टोल विकास संस्था नगर समन्वय समितिका अध्यक्ष ध्रुव प्रसाद अधिकारीको अध्यक्षता हेटौंडा–८ का वडा सदस्य गोरखनाथ राय तथा हेटौंडा–२ का वडा सदस्य एवं वन, वातावरण तथा विपद व्यवस्थापन समितिका सदस्य इन्द्र रिजालको विशेष आतिथ्यतामा कार्यक्रम सम्पन्न भएको हो ।
टोल विकास संस्था नगर समन्वय समिति, हेटौंडा उपमहानगरपालिकाको आयोजना तथा टोल विकास संस्था वडा समन्वय समिति, हेटौंडा–८ र डिभिजन वन कार्यालय, मकवानपुर, चन्द्रोदय मा.वि, हेटौंडा-८ को संयोजनमा कार्यक्रम सम्पन्न भएको हो। रोपिएका बिरुवाहरूको संरक्षणका लागि तारजालीसहितको व्यवस्थापन गरिएको आयोजक संस्थाले जनाएको छ।
नगर समन्वय समितिका अध्यक्ष ध्रुव अधिकारीले भन्नुभयो, “वातावरणीय सन्तुलन कायम राख्न वृक्षारोपणजस्ता अभियानहरू अत्यन्त महत्वपूर्ण छन्। यसले न केवल हरियाली बढाउँछ, वातावरण स्वच्छ राख्न सहयोग गर्छ, साथै युवाहरूलाई पनि प्रकृतिप्रतिको प्रेम र उत्तरदायित्वका भावनाले प्रेरित गर्छ। टोल विकास संस्थाहरूको अग्रसरता र सामूहिक प्रयासले मात्र समृद्ध र हरित हेटौंडाको निर्माण सम्भव छ।”
कार्यक्रममा वातावरणप्रेमी संघसंस्था, विद्यालय, स्थानीय समुदायका प्रतिनिधिहरू, विद्यार्थीहरू तथा सञ्चारकर्मीहरूको सक्रिय उपस्थिति थियो। सहभागीहरूले वृक्षारोपणजस्ता कार्यक्रमलाई निरन्तरता दिँदै वातावरण संरक्षणमा सबैको सक्रिय सहभागिता आवश्यक रहेकोमा जोड दिएका थिए।















