हेटौँडा / मिना कुमारी लामा ले सुकुमबासी बस्ती हटाउने सरकारी कदमबारे सामाजिक सञ्जालमार्फत आफ्नो धारणा सार्वजनिक गर्दै विकास र मानवीय संवेदनाबीच सन्तुलन आवश्यक रहेको बताएकी छन्।
उनले विकासको प्रारम्भ कहिलेकाहीँ कठोर र क्रुर देखिने भए पनि दीर्घकालमा त्यसले सुन्दर र व्यवस्थित संरचना निर्माण गर्ने उल्लेख गरेकी छन्। हाल सुकुमबासी बस्तीमा डोजर चलाइएको विषयले देशभर बहस सिर्जना गरिरहेको सन्दर्भमा उनले यसलाई विकासको एउटा आवश्यक तर संवेदनशील प्रक्रिया भएको बताइन्।
उनले बालेन्द्र शाह को नेतृत्वमा भइरहेको शहरी व्यवस्थापन प्रयासलाई साहसी र दूरदर्शी कदमका रूपमा व्याख्या गर्दै देश निर्माणमा उहाँको सोच, आँट र प्रतिबद्धता उल्लेख गरिन्।
साथै, उनले सुकुमबासी नागरिकप्रति अपहेलना हुने गरी आलोचना नगर्न आग्रह गर्दै अधिकांश नागरिक परिस्थिति र नियतिको कारण सार्वजनिक जग्गामा बस्न बाध्य भएको स्पष्ट पारिन्। उनीहरूलाई उचित पुनर्वास र व्यवस्थापन गर्नु राज्यको दायित्व भएको पनि उनले जोड दिइन्।
उनका अनुसार, विगतमा माइतीघर मण्डला, शान्ति बाटिका र पशुपति क्षेत्र मा भएका संरचना हटाउँदा पनि विवाद उत्पन्न भएको थियो। तर, अहिले ती स्थानहरू सुन्दर र व्यवस्थित रूपमा विकास भई उदाहरणका रूपमा प्रस्तुत भएका छन्।
लामाले विकासका लागि पार्क, चौडा सडक र खुला स्थान आवश्यक पर्ने भए पनि निर्माणका क्रममा हुने विरोधले कहिलेकाहीँ प्रगतिमा अवरोध सिर्जना गर्ने उल्लेख गरिन्। उनले प्रभावित नागरिकका अधिकारको संरक्षण गर्दै विकास कार्यमा सबैले सहकार्य गर्नुपर्नेमा जोड दिइन्।
अन्त्यमा, उनले देशको विकास एक पुस्ताका लागि मात्र नभई दीर्घकालीन रूपमा भावी पुस्ताका लागि हुने भएकाले सामूहिक हितलाई प्राथमिकता दिनुपर्ने धारणा व्यक्त गरिन्।
