हेटौंडा ।
नेकपा एमालेका उम्मेदवारले मनोनयन दर्ता गरेको केही बेरमानै गठबन्धनका उम्मेदवारले मनोनयन दर्ता गराएका छन् । सत्तारुढ गठबन्धनको तर्फबाट हेटौंडा उपमहानगरपालिकाको मेयर पदमा मीना कुमारी लामा र उपमेयर पदमा राजेश बानियाँले उम्मेदवारी दर्ता गराउनुभएको छ ।
गठबन्धन दलबल सहित उम्मेदवारी दर्ता गराउनका लागि निर्वाचन अधिकृतको कार्यालयमा पुगेका थिए । लामा हेटौंडाको उपमेयर हुनुहुन्छ भने बानियाँ हेटौंडा ५ को वडा अध्यक्ष हुनुहुन्छ ।
सत्तारुढ दलबीचको सहमतिमा नेकपा एकीकृत समाजवादीबाट मीना कुमारी लामा मेयर पदमा उम्मेदवार बन्नु भएको हो भने नेपाली कांग्रेसबाट राजेश बानियाँ उपमेयर पदमा उम्मेदवार बन्नु भएको छ । सत्तारुढ गठबन्धनबीच हेटौंडा उपमहानगरको वडा तहमा पनि तालमेलको प्रयास भएको छ । कतिपय वडामा गठबन्धनबीच तालमेल भएको छ भने कतिपय वडामा तालमेल हुन सकेको छैन ।
आसन्न स्थानीय तह निर्वाचनको लागि हेटौंडा उपमहानगरपालिकाको मेयर, उपमेयर, वडाध्यक्ष तथा सदस्य पदहरुमा उम्मेदवारी दर्ता गर्न सत्तारुढ गठबन्धन दल हेटौंडाको मुख्य निर्वाचन अधिकृतको कार्यालय पुगेर उम्मेदवारी दर्ता गराएका छन् ।
बाजागाजा र झाँकीसहित ठूलो संख्यामा कांग्रेसका नेता साथै कार्यकर्ताहरु मुख्य निर्वाचन अधिकृतको कार्यालय परिसरमा पुगेका हुन् । त्यसैगरी कांग्रेस, नेकपा समाजवादी, नेकपा माओवादीलगायतका पार्टीहरुले १९ वटै वडाका लागि अध्यक्ष साथै सदस्यहरुको उमेद्वारहरुले मनोनयन दर्ता गराएका छन्।
