काठमाडौं ।
सोमबार सम्पन्न नेपाल, पपुवा न्यूगिनी (पिएनजी) र मलेसियाविरुद्धको त्रिकोणात्मक सिरिजमा चार्ल्स जोर्डन अमिनीको प्रदर्शन ठिकै रह्यो । उनले सिरिज अवधिभर एक अर्धशतकसहित १२५.७१ को स्ट्राइक रेटमा १३२ रन बनाए । अमिनी सिरिजमा सर्वाधिक रन बनाउने मामलामा सातौँ स्थानमा रहे ।
टी–२० मा सोचेअनुरूप प्रदर्शन गर्न नसके पनि उनले नेपालसँगको एकदिवसीय सिरिज पिएनजीलाई जिताउन अहम् भूमिका खेले । अमिनीले सो सिरिजमा कुल ११२ रन बनाउनुका साथै ३ विकेट लिए ।
नेपालविरुद्धको सो श्रृंखला क्लिन स्विप गराउन नायक सावित भएका उनी प्लेयर अफ द सिरिज पनि घोषित भए । आफ्नो टिमले टी–२० त्रिकोणात्मक सिरिज गुमाए पनि अमिनी नेपाली समर्थकको मिठो साथले मक्ख छन् । फाइनलमा नेपालसँग ५० रनको फराकिलो हार बेहोरे पनि उनले नेपाली समर्थकको माया अविश्सनीय रहेको बताए ।
‘फाइनल हार्दा निराश छु । तर, नेपाली समर्थकका अगाडि खेल्दा निकै गज्जब अनुभव रह्यो । उनीहरूले पिएनजी बोलेको आवाज अविश्वसनीय लाग्यो । झन् दृश्य नै देख्दा अचम्म लाग्यो । टियु स्टेडियममा खेलेको खेल कहिल्यै बिर्सने छैन,’ अमिनीले खेलपछि ट्विटरमा लेखेका छन् ।
Disappointed to lose the final but what an experience it was to play in front of these Nepal fans. Unbelievable scenes of them chanting PNG. Absolutely amazing!. Will never forget playing here at TU stadium. 👏🏽 pic.twitter.com/U8Lf7N2ZYE
— Charles Jordan Amini (@CJAmini) April 4, 2022
हुन पनि आज नेपाली समर्थकले मैदान बाहिरबाट राम्रो हौसला प्रदान गरेका थिए । पिएनजीलाई मात्र होइन नेपाली समर्थकले यहाँ खेल्ने विदेशी जुनसुकै टोलीलाई पनि मिठो साथ दिँदै आइरहेका छन् ।
नेपालले टेष्ट टोली जिम्बाब्वेसँग सिरिज खेल्ने
नेपाली राष्ट्रिय क्रिकेट टिमले जिम्बाब्वेको ‘ए’ टिमसँग सिरिज खेल्ने भएको छ । नेपाल क्रिकेट संघ (क्यान) का अनुसार नेपालले वैशाखभित्र टी–२० र एकदिवसीय प्रारूपको सिरिज खेल्ने भएको हो ।
नेपालले जिम्बाब्वे ‘ए’ सँग तीन–तीन खेलको टी–२० र एकदिवसीय सिरिज खेल्ने क्यान अध्यक्ष चतुरबहादुर चन्दले जानकारी दिए । उनका अनुसार सिरिज नेपालमै हुनेछ । जिम्बाब्वेको ‘ए’ टिममा राष्ट्रिय टिमबाट खेलिसकेका सदस्य पनि हुने चन्दले बताए ।
यो पनि पढौं– ‘त्रिकोणात्मक सिरिज’ जितेपछि नेपाली टिमबारे भारतीय मिडियाले के लेखे?
