काठमाडौं ।
नेपाली राष्ट्रिय क्रिकेट टिमले केन्यासँग ५ खेलको टी-ट्वान्टी सिरिज खेल्ने भएको छ । नेपालले केन्यासँग उसैको मैदानमा ५ खेलको सिरिज खेल्ने भएको हो ।नेपाल क्रिकेट संघ (क्यान) का अनुसार नेपालले अगष्ट चौथो सातादेखि केन्यामा गएर पाँच टि२० आई सिरिज र तीन एकदिवसिय अभ्यास खेल खेल्ने भएको छ ।
यस्तै नेपालले अभ्यास खेलको रुपमा ५० ओभरको तीन खेल खेल्नेछ । सिरिजका लागि नेपाली टोली अगस्टको अन्तिम साता केन्याको भ्रमणमा निस्कने छ ।
क्यानका अध्यक्ष चतुरबहादुर चन्दले नेपालले केन्यासँग खेल्ने पाँच टि२० आई पक्का भएको बताएका छन् । ‘हामी तालिका मिलाउँदै छौं । टि२० आई पाँच खेलको हुनेछ । बाँकी तीन अभ्यास खेल ५० ओभरको हुनेछ,’ उनले भने ‘टिम १७–१८ अगष्ट तिर जान्छ होला । टि२० आईमा सन्दीप लामिछानेले नै कप्तानी गर्छन् । बाँकी एकदिवसिय अभ्यास खेलमा उपकप्तानले गर्नेछन्’, ।
केन्याको क्रिकेट संघले नेपाललाई सिरिजको निमन्त्रणा दिएको थियो । जसअन्तर्गत नेपाली टोली केन्या जान लागेको हो ।
एक समय एसोसिएट क्रिकेटको सशक्त टोली केन्याको स्तर अहिले भने केही खस्किएको छ ।
यता नेपाली राष्ट्रिय क्रिकेट टिमका कप्तान सन्दीप लामिछाने भने क्वारेवियन प्रिमियर लिग (सिपिएल) खेल्न वेस्टइन्डिज जाँने भएका छन् । त्यसैले नेपालले तालिका केहि फेरबदल गर्नुपर्ने जस्तो देखिन्छ । सिपिएल ३१ अगष्ट देखि सुरु हुनेछ । सन्दीपले जमैका तलवाजबाट सिपिएल खेल्नेछन् ।
नेपाल र केन्या दुवैले २०२३ मा हुने एकदिवसिय विश्वकप छनोट चरण खेलिरहेका छन् । नेपालले माथिल्लो स्तरको खेल्दा केन्याले सबैभन्दा तल्लोक्रमको छनोट खेलेको छ । नेपालले आइसिसी विश्वकप लिग–२ त्रिकोणात्मक ओडिआई सिरिज खेल्दै आएको छ । केन्याले क्रिकेट विश्वकप च्यालेन्ज लिग बी खेलेको छ । जसमा केन्या, हङकङ, इटाली, बर्मुडा, जर्सी र युगान्डा छन् ।
यो पनि : नेपाली क्रिकेटले ‘चाँडै’ नयाँ प्रशिक्षक पाउँदै
क्यानडाका पुबुदु दासानायकेले अचानक पदबाट राजीनामा दिएपछि नेपाली राष्ट्रिय क्रिकेट टिम अहिले प्रशिक्षकविहीन अवस्थामा छ । आईसीसी एकदिवसीय विश्वकपको छनोट प्रतियोगिता क्रिकेट विश्वकप लिग–२ खेलिरहेको नेपाली टोली दुई सातादेखी प्रशिक्षकविहीन बनेको हो ।
नेपाल क्रिकेट संघ (क्यान)का कार्यबहाक सचिव प्रशान्तविक्रम मल्लले भने चाँडै नेपाली टिमले नयाँ प्रशिक्षक पाउने बताएका छन् । “हामीलाई काम गर्नसक्ने, टोलीलाई अगाडि बढाउन सक्ने, टोलीलाई लामो समय दिनसक्ने प्रशिक्षक खाँचो छ,” मल्लले भने, “हामी आन्तरिक प्रक्रियाबाट पनि प्रशिक्षक नियुक्त गर्न सक्छौँ । सूचना ननिकालेर पनि प्रशिक्षका ल्याउन सकिन्छ । छिट्टै नयाँ प्रशिक्षक नेपाली क्रिकेटले पाउँदैछ । शुभसमाचार नेपाल क्रिकेटले छिट्टै पाउँछ ।”
दोस्रोपटक कार्यभार सम्हाल्न आएका प्रशिक्षक दासानायकेले राजीनामा दिएपछि अहिले नेपाली क्रिकेटमा कस्तो प्रशिक्षक आउने हो भनेर चासोको रूपमा हेरिएको छ । पछिल्लो समय नेपाली क्रिकेटले राम्रो प्रशिक्षक पाए पनि उनीहरूलाई लामो समय टिकाएर राख्न सकेको छैन । यसअघिका डेब वाटमोर र उमेश पटवालले पनि सम्झैताअनुसारको कार्यकाल पूरा नगरी नेपाली टिम छाडेका थिए । त्यसकारण पनि अब को आउने र कति समय टिक्ने भन्ने गम्भीर प्रश्न खडा छ ।
“हामीले खोज्ने भनेको बेस्ट कोच हो । जसले नेपाली क्रिकेटलाई राम्रोसँग ह्यान्डल गर्न सकोस् । टोलीमा प्रदर्शनको आधारमा केही कठिनाइ पनि छन् । त्यसलाई समाधान गर्ने प्रशिक्षकको खोजिमा छौँ,” क्यानका कार्यबहाक सचिव मल्लले नयाँ प्रशिक्षक नियुक्तिबारे भने, “अहिले हामीसँग विश्वका नाम चलेको प्रशिक्षक पनि छन् । तर, हामीलाई काम गर्न सक्ने र कठिन अवस्थामा रहेको टिमलाई हाँक्न सक्ने प्रशिक्षक चाहिएको हो ।”
निवर्तमान प्रशिक्षक दासानायकेले नेपाल छाडेपछि ‘राष्ट्रिय क्रिकेट टोलीमा गुट, उपगुट र विवाद भएको’ स्वीकार गरेका छन् । तथापि उनले वर्तमान अवस्थामा कम भएको बताएका छन् । पहिलो कार्यकालमा नेपाली क्रिकेटलाई सफलताको उचाइको पुर्याएका दासानायकेको दोस्रो कार्यकालबाट पनि सोही खालको अपेक्षा गरिएको थियो । तर, दासानायकेको दोस्रो कार्यकाल भने सुखद हुन सकेन ।
नेपाली क्रिकेटलाई उकास्नका लागि नेपाली संस्कृति र खेलाडीको मनोभावना बुझ्न सक्ने प्रशिक्षक आवश्यक रहेको पूर्व कप्तान पवन अग्रवालले बताए । उनले भारत, श्रीलंका, पाकिस्तानका लेभल थ्री कोर्स गरेका प्रशिक्षक भए नेपाली टोलीलाई सहज हुने बताए । भाषा र संस्कृति नबुझ्ने समस्याका कारण पनि कतिपय खेलाडीलाई प्रशिक्षणमा कठिन भएको अग्रवालको बुझाइ छ ।
“पु्बुदुको दोस्रो कार्यकालमा अपेक्षा अनुसारको नतिजा आउन सकेन । अहिले हामीलाई चाहिने भनेको नेपाली संस्कृति र खेलाडीको मनोभावना बुझ्ने प्रशिक्षक हो । खेलाडी र प्रशिक्षकबीच भाषा मिल्न आवश्यक छ,” अग्रवालले थपे, “नेपाली संस्कृति बुझ्नुसक्ने भयो भनते खेलाडीसँगको संवाद केही हदसम्म सहज हुन्छ ।”
