काठमाडौं । नेपाल क्रिकेट संघ (क्यान) ले पुबुदु दासानायकेलाई नेपाली क्रिकेट टोलीको मेन्टर नियुक्त गरेको छ। पुबुदुलाई अमेरिकामा हुने विश्व कप लिग टु अन्तर्गतको सिरिजका लागि नेपाली टोलीको मेन्टरमा नियुक्त गरिएको क्यानले बिहीवार प्रेस विज्ञप्ति मार्फत जनाएको छ ।
नेपाल, स्कटल्यान्ड र अमेरिकाबीचको त्रिकोणात्मक सिरिजका लागि पुबुदुलाई मेन्टरमा नियुक्त गरिएको हो । अमेरिकामा यही कार्तिक ९ बाट १९ गतेसम्म त्रिकोणात्मक सिरिज आयोजना हुदैछ ।
सिरिजमा नेपालको पहिलो खेल कात्तिक ११ गते अमेरिकासँग तथा दोस्रो खेल कात्तिक १३ गते स्कटल्यान्डसँग हुनेछ । नेपालले तेस्रो खेलमा कात्तिक १७ गते अमेरिकासँग र चौथो तथा अन्तिम खेलमा कात्तिक १९ गते स्कटल्यान्डसँग प्रतिस्पर्धा खेल्नेछ ।
सिरिजको सबै खेल अमेरिकाको टेक्सासस्थित डालसमा रहेको ग्रान्ड प्रेरि स्टेडियममा हुनेछ। सबै खेल नेपाली समयअनुसार राति ९ः१५ बजे सुरु हुनेछ।
पुबुदु नेपाली टोलीका पूर्व प्रशिक्षक हुन् । उनकै नेतृत्वमा नेपालले सन् २०१४ मा पहिलो पटक टि ट्वान्टी विश्वकप खेलेको थियो। केहि दिन अघि नेपाल प्रिमियर लिग (एनपिएल) टोली जनकपुर बोल्ट्सले मुख्य प्रशिक्षक नियुक्त गरेको थियो।
हेर्नुस् क्यानको विज्ञप्ति:
