सलाहको उत्कृष्ट गोलमा लिभरपुलको रोमाञ्चक जित

Image

काठमाडौं । इङ्ग्लिस प्रिमियर लिगमा फरवार्ड मोहम्मद सलाहको दुई गोलमा शीर्षस्थानको लिभरपुलले रोमाञ्चक जित हासिल गरेको छ । लिग लिडर लिभरपुलले इङ्लिस प्रिमियर लिगमा आइतबार घरेलु टोली साउथह्याम्पटनविरुद्ध ३-२ को रोमाञ्चक जित दर्ता गरेको हो ।

जितसँगै लिभरपुलले १२ खेलमा ३१ अंक जोडेको छ । पराजित साउथह्याम्पटन समान खेलबाट चार अंकका साथ पुछारमा छ ।

सेन्ट म्यारी रंगशालामा लिभरपुललाई जित दिलाउन मोहम्मद सलाहले दुई र डोमिनिक स्जोबोस्जलाइले एक गोल गरे । साउथह्याम्पटनका लागि एडम आर्मस्ट्रङ र म्याथ्यु फर्नान्डेसले गोल फर्काए ।

खेलको ३०औं मिनेटमा स्जोबोस्जलाइको गोलमार्फत लिभरपुलले अग्रता लिएको थियो । १२ मिनेटपछि आर्मस्ट्रङले खेललाई बराबरीमा ल्याए ।

फर्नान्डेसले ५२औं मिनेटमा गोल गर्दा साउथह्याम्पटन २-१ ले अगाडि बढ्यो । ९ मिनेटपछि सलाहले लिभरपुलका लागि बराबरी गोल फर्काए ।

सलाहले ८३औं मिनेटमा पेनाल्टीमार्फत व्यक्गित दोस्रो गोल गर्दै लिभरपुललाई रोमाञ्चक जित दिलाए ।